ਕਈ ਮਾਮਲਿਆਂ ਵਿੱਚ ਬਲੈਂਕੇਟ ਬੇਲ ਮਿਲਣ ਤੋਂ ਬਾਅਦ ਵੀ ਪੰਜਾਬ ਦੇ ਸਾਬਕਾ ਡੀਜੀਪੀ ਸੁਮੇਧ ਸਿੰਘ ਸੈਣੀ ਦੀਆਂ ਮੁਸ਼ਕਲਾਂ ਘੱਟ ਹੁੰਦੀਆਂ ਨਜ਼ਰ ਨਹੀਂ ਆ ਰਹੀਆਂ। ਪੰਜਾਬ ਵਿਜੀਲੈਂਸ ਬਿਊਰੋ ਦੀ ਟੀਮ ਨੇ ਸੋਮਵਾਰ ਸ਼ਾਮ ਕਰੀਬ 4 ਵਜੇ ਸੈਣੀ ਵਿਰੁੱਧ ਬੇਨਾਮੀ ਜਾਇਦਾਦ ਦਾ ਕੇਸ ਦਰਜ ਕੀਤਾ।
ਕੇਸ ਦਰਜ ਹੋਣ ਦੇ ਚਾਰ ਘੰਟਿਆਂ ਬਾਅਦ, ਰਾਤ 8 ਵਜੇ ਦੇ ਕਰੀਬ, ਪੰਜਾਬ ਵਿਜੀਲੈਂਸ ਬਿਊਰੋ ਦੇ ਏਆਈਜੀ ਗਗਨ ਅਜੀਤ ਸਿੰਘ, ਐਸਐਸਪੀ ਵਰਿੰਦਰ ਬਰਾੜ ਅਤੇ ਦੋ ਦਰਜਨ ਪੁਲਿਸ ਕਰਮਚਾਰੀਆਂ ਨੇ ਚੰਡੀਗੜ੍ਹ ਦੇ ਸੈਕਟਰ -20 ਸਥਿਤ ਕੋਠੀ ਵਿੱਚ ਛਾਪਾ ਮਾਰਿਆ। ਹਾਲਾਂਕਿ, ਸਾਬਕਾ ਡੀਜੀਪੀ ਸੁਮੇਧ ਸਿੰਘ ਸੈਣੀ ਕੋਠੀ ਵਿਚ ਨਹੀਂ ਮਿਲੇ। ਇਸ ਦੇ ਬਾਵਜੂਦ ਪੰਜਾਬ ਵਿਜੀਲੈਂਸ ਬਿਊਰੋ ਦੀ ਟੀਮ ਨੇ ਉਸ ਦੇ ਘਰ ਵਿੱਚ ਕੁੱਲ 6 ਘੰਟੇ 45 ਮਿੰਟ ਤਲਾਸ਼ੀ ਮੁਹਿੰਮ ਚਲਾਈ।
ਇਸ ਦੌਰਾਨ ਟੀਮ ਕੋਠੀ ਦੇ ਹਰ ਏਰੀਆ ਦੀ ਚੈਕਿੰਗ ਕਰਦੀ ਰਹੀ। ਰਾਤ 8 ਵਜੇ ਕੋਠੀ ਪਹੁੰਚੀ ਪੁਲਿਸ ਨੇ 2.45 ਵਜੇ ਤੱਕ ਕੋਠੀ ਦੇ ਅੰਦਰ ਸੈਣੀ ਅਤੇ ਉਸਦੀ ਕੋਠੀ ਨਾਲ ਜੁੜੇ ਅਹਿਮ ਕਾਗਜ਼ਾਂ ਸਮੇਤ ਹੋਰ ਸਾਮਾਨ ਦੀ ਭਾਲ ਜਾਰੀ ਰੱਖੀ। ਪਰ ਇੰਨਾ ਲੰਬਾ ਸਰਚ ਆਪਰੇਸ਼ਨ ਚਲਾਉਣ ਦੇ ਬਾਅਦ ਵੀ ਟੀਮ ਨੂੰ ਖਾਲੀ ਹੱਥ ਪਰਤਣਾ ਪਿਆ। ਸੂਤਰਾਂ ਦੀ ਮੰਨੀਏ ਤਾਂ ਇਸ ਮਾਮਲੇ ਵਿੱਚ ਸਾਬਕਾ ਡੀਜੀਪੀ ਸੁਮੇਧ ਸਿੰਘ ਸੈਣੀ ਸਮੇਤ ਕੁੱਲ 6 ਲੋਕਾਂ ਦੇ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਹੈ। ਜਦੋਂ ਕਿ ਅਧਿਕਾਰੀ ਇਸ ਮਾਮਲੇ ਵਿੱਚ ਕੁਝ ਵੀ ਬੋਲਣ ਤੋਂ ਕੰਨੀ ਕਤਰਾਉਂਦੇ ਨਜ਼ਰ ਆਏ। ਹੈਰਾਨੀ ਦੀ ਗੱਲ ਹੈ ਕਿ ਇਸ ਛਾਪੇਮਾਰੀ ਵਿੱਚ ਸਿਰਫ ਬਿਊਰੋ ਦੀ ਮੋਹਾਲੀ ਟੀਮ ਸ਼ਾਮਲ ਨਹੀਂ ਸੀ, ਬਲਕਿ ਪਟਿਆਲਾ ਅਤੇ ਹੋਰ ਖੇਤਰਾਂ ਦੇ ਪੁਲਿਸ ਕਰਮਚਾਰੀ ਸ਼ਾਮਲ ਸਨ।
ਉਹ ਕੋਠੀ ਜਿਸਨੂੰ ਸਾਬਕਾ ਡੀਜੀਪੀ ਸੁਮੇਧ ਸਿੰਘ ਸੈਣੀ ਨੇ 2.5 ਲੱਖ ਰੁਪਏ ਵਿੱਚ ਕਿਰਾਏ ‘ਤੇ ਲੈਣ ਦੀ ਗੱਲ ਕਹੀ ਸੀ। ਇਹ ਕੋਠੀ ਸੈਣੀ ਨੇ 2018 ਵਿੱਚ ਨਿਮ੍ਰਤ ਨਾਂ ਦੇ ਵਿਅਕਤੀ ਤੋਂ ਸਾਢੇ 6 ਕਰੋੜ ਵਿੱਚ ਖਰੀਦੀ ਸੀ। ਜਿਸ ਕਾਰਨ ਨਵਾਂ ਕੇਸ ਦਰਜ ਕੀਤਾ ਗਿਆ ਹੈ। ਦੱਸ ਦੇਈਏ ਕਿ ਕੋਠੀ ਦਾ ਟੀਮ ਬੁਲਾ ਕੇ ਬਾਕਾਇਦਾ ਪੂਰੀ ਤਰ੍ਹਾਂ ਮਾਪ ਕਰਵਾਇਆ ਗਿਆ। ਕੋਠੀ ਦੇ ਅੰਦਰੋਂ ਮੁੱਖ ਗੇਟ ਤੱਕ ਸਾਰੇ ਪਾਸਿਓਂ ਮਾਪ ਲਏ ਗਏ ਹਨ। ਹਾਲਾਂਕਿ, ਜਦੋਂ ਵਿਜੀਲੈਂਸ ਟੀਮ ਨੂੰ ਮਾਪ ਦੀ ਚੌੜਾਈ ਸਮੇਤ ਡੂੰਘਾਈ ਬਾਰੇ ਪੁੱਛਿਆ ਗਿਆ, ਤਾਂ ਉਸਨੇ ਕੁਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ।
ਤੁਹਾਨੂੰ ਦੱਸ ਦੇਈਏ ਕਿ ਵਿਜੀਲੈਂਸ ਟੀਮ ਨੇ ਸਭ ਤੋਂ ਪਹਿਲਾਂ ਸਾਬਕਾ ਡੀਜੀਪੀ ਸੁਮੇਧ ਸਿੰਘ ਸੈਣੀ ਦੀ ਕੋਠੀ ਦੇ ਅੰਦਰ ਖੜ੍ਹੀ ਕਾਰ ਦੇ ਉੱਤੇ ਪਰਦਾ ਪਾਇਆ। ਉਸ ਤੋਂ ਬਾਅਦ ਕਾਰ ਦੀ ਫੋਟੋ ਦੇ ਨਾਲ-ਨਾਲ ਪੂਰੇ ਘਰ ਦੀ ਵੀਡੀਓਗ੍ਰਾਫੀ ਵੀ ਕੀਤੀ ਗਈ। ਟੀਮ ਨੇ ਕੋਠੀ ਦੇ ਅੰਦਰ ਬਣੇ ਹਰ ਕਮਰੇ ਦੇ ਨਾਲ ਬੇਸਮੈਂਟ ਦੀ ਵੀਡੀਓਗ੍ਰਾਫੀ ਵੀ ਕੀਤੀ। ਹਾਲਾਂਕਿ, ਟੀਮ ਦੇ ਹੱਥ ਵਿੱਚ ਕੋਈ ਖਾਸ ਦਸਤਾਵੇਜ਼ ਨਹੀਂ ਲੱਗੇ।
ਵਿਜੀਲੈਂਸ ਟੀਮ ਨੇ ਕੋਠੀ ਦੇ ਅੰਦਰ ਬਣੇ ਬੇਸਮੈਂਟ ਵਿੱਚ ਲਗਭਗ 4 ਵਾਰ ਤਲਾਸ਼ੀ ਮੁਹਿੰਮ ਚਲਾਈ, ਜੋ 6 ਘੰਟੇ 45 ਮਿੰਟ ਤੱਕ ਚੱਲੀ। ਸਵਾਲ ਇਹ ਹੈ ਕਿ ਟੀਮ ਵਾਰ-ਵਾਰ ਕੋਠੀ ਦੇ ਅੰਦਰ ਕਿਉਂ ਜਾ ਰਹੀ ਸੀ। ਜਦੋਂ ਕਿ ਸੂਤਰਾਂ ਦਾ ਕਹਿਣਾ ਹੈ ਕਿ ਟੀਮ ਨੂੰ ਸ਼ੱਕ ਸੀ ਕਿ ਬੇਸਮੈਂਟ ਦੇ ਅੰਦਰ ਰੱਖੀਆਂ ਗਈਆਂ ਚੀਜ਼ਾਂ ਦੇ ਵਿਚਕਾਰ ਕੁਝ ਮਹੱਤਵਪੂਰਨ ਕਾਗਜ਼ਾਤ ਵੀ ਰੱਖੇ ਗਏ ਸਨ। ਜਿਸ ਕਰਕੇ ਟੀਮ ਲਗਾਤਾਰ ਬੇਸਮੈਂਟ ਦੇ ਅੰਦਰ ਜਾ ਰਹੀ ਸੀ ਅਤੇ ਚੱਪੇ-ਚੱਪ ਦੀ ਖੋਜ ਕਰ ਰਹੀ ਸੀ, ਪਰ ਉਥੋਂ ਵੀ ਟੀਮ ਹੱਥ ਨਿਰਾਸ਼ਾ ਹੀ ਲੱਗੀ।
ਦੇਰ ਰਾਤ ਤੱਕ ਚੱਲੀ ਇਸ ਰੇਡ ਵਿੱਚ ਸੈਣੀ ਉਸ ਦੀ ਕੋਠੀ ਵਿੱਚ ਨਹੀਂ ਮਿਲਿਆ, ਪਰ ਵਿਜੀਲੈਂਸ ਟੀਮ ਨੇ ਸੈਣੀ ਦੀ ਕੋਠੀ ਦੇ ਆਲੇ-ਦੁਆਲੇ ਦੀਆਂ ਕੰਧਾਂ ਨੂੰ ਪੂਰੀ ਫੋਰਸ ਨਾਲ ਘੇਰਿਆ ਹੋਇਆ ਸੀ, ਤਾਂਜੋ ਜੇਕਰ ਸੈਣੀ ਘਰ ਵਿੱਚ ਹੋਣ ਤਾਂ ਉਹ ਘਰ ਦੇ ਪਿਛਲੇ ਗੇਟ ਤੋਂ ਬਚ ਕੇ ਨਾ ਨਿਕਲ ਸਕਣ। ਇਸ ਦੌਰਾਨ ਪੰਜਾਬ ਵਿਜੀਲੈਂਸ ਦੀ ਟੀਮ ਦੇ ਨਾਲ ਚੰਡੀਗੜ੍ਹ ਦੇ ਸੈਕਟਰ -19 ਥਾਣੇ ਦੇ ਕੁਝ ਕਰਮਚਾਰੀ ਵੀ ਦਿਖਾਏ ਦਿੱਤੇ। ਹਾਲਾਂਕਿ, ਚੰਡੀਗੜ੍ਹ ਪੁਲਿਸ ਸਿਰਫ ਵਿਜੀਲੈਂਸ ਟੀਮ ਦੀ ਮਦਦ ਕਰਨ ਗਈ ਸੀ।
ਸੈਣੀ ਨੂੰ ਵਿਜੀਲੈਂਸ ਬਿਊਰੋ ਦੀ ਟੀਮ ਕੋਠੀ ਪਹੁੰਚਣ ਦੀ ਜਾਣਕਾਰੀ ਪਹਿਲਾਂ ਹੀ ਮਿਲ ਚੁੱਕੀ ਸੀ ਅਤੇ ਉਹ ਕੋਠੀ ਵਿੱਚ ਮੌਜੂਦ ਨਹੀਂ ਸੀ। ਇਸ ਲਈ ਕਰੀਬ ਇੱਕ ਘੰਟੇ ਤੱਕ ਵਿਜੀਲੈਂਸ ਬਿਊਰੋ ਦੇ ਕਰਮਚਾਰੀਆਂ ਅਤੇ ਕੋਠੀ ਦੇ ਅੰਦਰ ਸੁਰੱਖਿਆ ਵਿੱਚ ਤਾਇਨਾਤ ਸੀਆਰਪੀਐਫ ਦੇ ਜਵਾਨਾਂ ਵਿੱਚ ਇਸ ਬਾਰੇ ਬਹਿਸ ਹੋਈ ਕਿ ਉਹ ਗੇਟ ਕਿਉਂ ਨਹੀਂ ਖੋਲ੍ਹ ਰਹੇ ਹਨ। ਛਾਪੇਮਾਰੀ ਵਿੱਚ ਸ਼ਾਮਲ ਸੀਆਰਪੀਐਫ ਨੇ ਕੋਠੀ ਨੂੰ ਅਗਲੇ ਅਤੇ ਪਿਛਲੇ ਦੋਹਾਂ ਦਰਵਾਜ਼ਿਆਂ ਤੋਂ ਘੇਰ ਲਿਆ ਅਤੇ ਦੋਵਾਂ ਉੱਤੇ ਕਰੀਬ 10 ਤੋਂ 15 ਸਿਪਾਹੀ ਸਾਦੇ ਕੱਪੜਿਆਂ ਵਿੱਚ ਤਾਇਨਾਤ ਸਨ। ਕੋਠੀ ਦੇ ਅੰਦਰੋਂ ਇੱਕ ਵਿਅਕਤੀ ਗੇਟ ਦੇ ਬਾਹਰ ਆਇਆ ਅਤੇ ਛਾਪੇਮਾਰੀ ਕਰਨ ਆਏ ਸਿਪਾਹੀਆਂ ਨੂੰ ਕਿਹਾ ਕਿ ਉਨ੍ਹਾਂ ਦੇ ਵਕੀਲ ਕੁਝ ਦੇਰ ਵਿੱਚ ਪਹੁੰਚ ਰਹੇ ਹਨ, ਉਸ ਤੋਂ ਬਾਅਦ ਉਹ ਦਰਵਾਜ਼ਾ ਖੋਲ੍ਹ ਦੇਣਗੇ। ਦੱਸਿਆ ਗਿਆ ਕਿ ਵਿਅਕਤੀ ਕੋਠੀ ਵਿੱਚ ਕੇਅਰ ਟੇਕਰ ਦਾ ਕੰਮ ਕਰਦਾ ਹੈ। ਇਹ ਡਰਾਮਾ ਤਕਰੀਬਨ ਇੱਕ ਘੰਟਾ ਚੱਲਦਾ ਰਿਹਾ, ਜਦੋਂ ਕਿ ਛਾਪੇਮਾਰੀ ਕਰਨ ਆਏ ਆਦਮੀਆਂ ਨੇ ਚਾਬੀ ਬਣਾਉਣ ਵਾਲੇ ਵਿਅਕਤੀ ਨੂੰ ਵੀ ਬੁਲਾਇਆ ਸੀ।
ਅਧਿਕਾਰੀ ਛਾਪੇਮਾਰੀ ਲਈ ਕੋਠੀ ਪਹੁੰਚੇ ਹੀ ਸਨ ਕਿ ਸੈਣੀ ਦੇ ਵਕੀਲ ਰਮਨਪ੍ਰੀਤ ਸਿੰਘ ਸੰਧੂ ਮੌਕੇ ‘ਤੇ ਪਹੁੰਚ ਕੇ ਛਾਪੇਮਾਰੀ ਕਰਨ ਆਏ ਅਧਿਕਾਰੀਆਂ ਤੋਂ ਪੁੱਛਿਆ ਕਿ ਉਹ ਹੁਣ ਕਿਸ ਸਬੰਧ ਵਿੱਚ ਕੋਠੀ ‘ਤੇ ਛਾਪਾ ਮਾਰਨ ਆਏ ਹਨ। ਕੀ ਇਹ ਪੁਰਾਣਾ ਮੁੱਦਾ ਹੈ ਜਾਂ ਨਵਾਂ। ਤਕਰੀਬਨ ਇੱਕ ਘੰਟੇ ਤੱਕ ਵਕੀਲ ਇਸੇ ਗੱਲ ‘ਤੇ ਅੜਿਆ ਰਿਹਾ ਕਿ ਪਹਿਲਾਂ ਸਥਾਨਕ ਪੁਲਿਸ ਨੂੰ ਆਉਣ ਦਿਓ, ਫਿਰ ਅੰਦਰ ਜਾਓ। ਇਸਦੇ ਨਾਲ ਹੀ ਉਸਨੇ ਚੰਡੀਗੜ੍ਹ ਪੁਲਿਸ ਕੰਟਰੋਲ ਰੂਮ ਨੂੰ ਸੂਚਿਤ ਕੀਤਾ। ਇੱਕ ਘੰਟੇ ਦੀ ਕੋਸ਼ਿਸ਼ ਤੋਂ ਬਾਅਦ ਇੱਕ ਵਿਅਕਤੀ ਅੰਦਰੋਂ ਆਇਆ ਅਤੇ ਬਿਊਰੋ ਦੇ ਕੁਝ ਅਧਿਕਾਰੀ ਸਥਾਨਕ ਐਸਐਚਓ ਸੈਕਟਰ -19 ਸਟੇਸ਼ਨ ਇੰਚਾਰਜ ਮਲਕੀਤ ਸਿੰਘ ਅਤੇ ਸੈਣੀ ਦੇ ਵਕੀਲ ਰਮਨਪ੍ਰੀਤ ਦੀ ਅਗਵਾਈ ਵਿੱਚ ਕੋਠੀ ਦੇ ਅੰਦਰ ਗਏ।
ਇਹ ਵੀ ਪੜ੍ਹੋ : ਅਟਾਰੀ ਬਾਰਡਰ ‘ਤੇ ਲਹਿਰਾਏਗਾ ਏਸ਼ੀਆ ਦਾ ਸਭ ਤੋਂ ਉੱਚਾ ਤਿਰੰਗਾ, NHAI ਨੇ 100 ਫੁੱਟ ਉੱਚਾ ਕਰਨ ਦੀ ਮੰਗੀ ਮਨਜ਼ੂਰੀ
ਵਿਜੀਲੈਂਸ ਅਧਿਕਾਰੀਆਂ ਅਨੁਸਾਰ ਕੁਝ ਦਿਨ ਪਹਿਲਾਂ ਮੁਹਾਲੀ ਅਦਾਲਤ ਨੇ ਇਸ ਕੋਠੀ ਨੂੰ ਅਟੈਚ ਕਰਨ ਦੀਆਂ ਹਦਾਇਤਾਂ ਜਾਰੀ ਕੀਤੀਆਂ ਸਨ। ਵਿਜੀਲੈਂਸ ਨੇ ਇਸ ਕੋਠੀ ਸਬੰਧੀ ਕੁਝ ਦਸਤਾਵੇਜ਼ ਅਦਾਲਤ ਵਿੱਚ ਪੇਸ਼ ਕੀਤੇ ਸਨ। ਜਿਸ ਵਿੱਚ ਇਹ ਪਾਇਆ ਗਿਆ ਕਿ ਸੈਣੀ ਨੇ ਕੋਠੀ ਖਰੀਦੀ ਹੋਈ ਹੈ, ਨਾ ਕਿ ਕਿਰਾਏ ‘ਤੇ ਹੈ। ਜਿਸ ‘ਤੇ ਅਦਾਲਤ ਨੇ ਦੋਵਾਂ ਧਿਰਾਂ ਨੂੰ ਸੁਣਨ ਤੋਂ ਬਾਅਦ ਇਸ ਕੋਠੀ ਨੂੰ ਅਟੈਚ ਕਰਨ ਦੇ ਨਿਰਦੇਸ਼ ਜਾਰੀ ਕੀਤੇ ਸਨ। ਇਸੇ ਬੇਨਾਮੀ ਮਾਮਲੇ ਵਿੱਚ ਹੁਣ ਵਿਜੀਲੈਂਸ ਬਿਊਰੋ ਨੇ ਵੀ ਸੈਣੀ ਵਿਰੁੱਧ ਸੋਮਵਾਰ ਨੂੰ ਨਵੀਂ ਐਫਆਈਆਰ ਦਰਜ ਕੀਤੀ ਸੀ।
