jagtar brar new song : ਜਗਤਾਰ ਬਰਾੜ ਪੰਜਾਬੀ ਸੰਗੀਤ ਜਗਤ ਲਈ ਕੋਈ ਨਵਾਂ ਨਾਮ ਨਹੀਂ ਹੈ। ਪਿਛਲੇ ਲੰਮੇ ਸਮੇਂ ਤੋਂ ਉਹ ਮਿਊਜ਼ਿਕ ਦੇ ਖੇਤਰ ਵਿੱਚ ਸਰਗਰਮ ਹੈ। ਉਹ ਗੱਲ ਵੱਖਰੀ ਹੈ ਕੀ ਉਸਦੇ ਬੜੀ ਸੀਮਿਤ ਜਿਹੇ ਹੀ ਗੀਤ ਆਏ ਨੇ, ਪਰ ਜਿੰਨੇ ਕੁ ਵੀ ਆਏ ਨੇ ਉਹਨਾਂ ਨੂੰ ਸਰੋਤਿਆਂ ਨੇ ਬੜੀ ਰੀਝ ਨਾਲ ਮਾਣਿਆ ਤੇ ਪ੍ਰਵਾਨ ਕੀਤਾ ਹੈ। ਗੋਰਾ ਨਿਛੋਹ ਰੰਗ ਤੇ ਕਿਸੇ ਫਿਲਮੀ ਐਕਟਰ ਵਰਗੇ ਇਸ ਗੱਭਰੁੂ ਅੰਦਰ ਲੋਹੜਿਆਂ ਦੀ ਸਾਦਗੀ ਹੈ। ਉਸਦੇ ਅੰਦਰ ਹਰ ਇੱਕ ਨਾਲ ਛੇਤੀ ਘੁਲ –ਮਿਲ ਜਾਣ ਦੀ ਇੱਕ ਵੱਖਰੀ ਹੀ ਕਲਾ ਹੈ। ਸਵਰਗਵਾਸੀ ਰਾਜ ਬਰਾੜ ਤੇ ਮੱਖਣ ਬਰਾੜ ਦੇ ਪਿੰਡ ਮੱਲਕੇ ਵਿੱਚ ਪੈਦਾ ਹੋਣ ਕਰਕੇ ਹੋਣ ਕਰਕੇ ਉਸਦੀ ਕਲਾਕਾਰੀ ਵਾਲੀ ਪਾਣ ਚੜ੍ਹਨੀ ਤਾਂ ਲਾਜ਼ਮੀ ਸੀ।
ਰਾਜ ਬਰਾੜ ਰਿਸ਼ਤੇ ‘ਚ ਉਸਦਾ ਚਾਚਾ ਹੀ ਲੱਗਦਾ ਸੀ। ਅਤੇ ਜਗਤਾਰ ਦੀ ਗਾਇਕੀ ਨੂੰ ਨਿਖਾਰਣ ਵਿੱਚ ਰਾਜ ਨੇ ਵੀ ਕੋਈ ਕੱਚ ਨਹੀਂ ਛੱਡਿਆ।ਉਸ ਨੇ ਜਗਤਾਰ ਨੂੰ ਵੀ ਕਈ ਗੀਤ ਲਿਖਕੇ ਦਿੱਤੇ। ਅਤੇ ਇਸਦੇ ਇਲਾਵਾ ਉਸਦੇ ਗੀਤਾਂ ਦਾ ਸੰਗੀਤ ਵੀ ਤਿਆਰ ਕੀਤਾ।ਇਹਨੀਂ ਦਿਨੀ ਵਿਦੇਸ਼ ‘ਚ ਵੱਸਦੇ ਜਗਤਾਰ ਦੇ ਭਾਵੇਂ ਇੱਕ-ਦੁੱਕਾ ਹੀ ਗੀਤ ਆਉਂਦੇ ਨੇ, ਪਰ ਉਸਦੇ ਗੀਤ ਕੁੜੀਏ ਬੇਸਮਝੇ, ਤੇਰੇ ਨਾਮ, ਅਤੇ ਇਸ ਦੇ ਇਲਾਵਾ ਉਮਰ ਵੀ ਕਾਫ਼ੀ ਚਰਚਾ ਵਿੱਚ ਰਹੇ ਨੇ, ਪਿਛਲੇ ਦਿਨੀਂ ਆਇਆ ਉਸ ਦਾ ‘ਵੋਟਾਂ’ ਗੀਤ ਵੀ ਕਾਫ਼ੀ ਚਰਚਾ ਵਿੱਚ ਰਿਹਾ ਜਿਸ ਵਿਚ ਉਸਨੇ ਰਾਜਨੀਤਿਕ ਪਾਰਟੀਆਂ ਦੀ ਚੰਗੀ ਭੰਮੀਰੀ ਬਣਾਈ ਸੀ।
ਗੀਤ ‘ਚ ਉਸਦਾ ਸਾਥ ਅਨੀਤਾ ਸਮਾਣਾ ਨੇ ਦਿੱਤਾ ਸੀ।ਇਸ ਗੀਤ ਨੂੰ ਜੱਗਾ ਭੀਖੀ ਵੱਲੋਂ ਲਿਖਿਆ ਗਿਆ। ਅਤੇ ਰੀਝ ਪ੍ਰੋਡਕਸ਼ਨ ਵੱਲੋਂ ਇਸਨੂੰ ਰਿਲੀਜ਼ ਕੀਤਾ ਗਿਆ ਸੀ।ਹੁਣ ਆਪਣੇ ਚਾਹੁਣ ਵਾਲਿਆਂ ਲਈ ਜਗਤਾਰ ਬਰਾੜ ਇਕ ਖਾਸ ਤੋਹਫਾ ਲੈ ਕੇ ਜਲਦ ਹਾਜ਼ਰ ਹੋ ਰਿਹਾ ਹੈ। ਛੇਤੀ ਹੀ ਉਸਦਾ ਨਵਾਂ ਗੀਤ ‘ਫਰੈਗਰੈੱਸ’ ਰਿਲੀਜ਼ ਹੋ ਰਿਹਾ ਹੈ।ਮੁਹੱਬਤ ਦੇ ਮਿੱਠੇ ਮਿੱਠੇ ਰੰਗਾਂ ਵਿੱਚ ਭਿੱਝੇ ਇਸ ਗੀਤ ਦਾ ਕੱਲਾ-ਕੱਲਾ ਬੋਲ ਰੂਹਾਂ ਦੇ ਦੀਵਾਨਿਆਂ ਦੇ ਮਨਾਂ ਵਿੱਚ ਸਦੀਵੀਂ ਤੌਰ ਤੇ ਲਹਿ ਜਾਵੇਗਾ।ਇਸ ਗੀਤ ਨੂੰ ਵੀ ਜੱਗਾ ਭੀਖੀ ਵੱਲੋਂ ਹੀ ਕਲਮਬੰਧ ਕੀਤਾ ਗਿਆ ਹੈ।ਤੇ ਇਸ ਦਾ ਮਿਊਜ਼ਿਕ ਰਾਜ ਢਿੱਲੋਂ ਵੱਲੋਂ ਕੀਤਾ ਗਿਆ ਹੈ। ਛੇਤੀ ਹੀ ਗੀਤ ਨੂੰ ਰੀਝ ਪ੍ਰੋਡਕਸ਼ਨ ਵੱਲੋਂ ਗਲੋਬਲ ਪੱਧਰ ਤੇ ਰਿਲੀਜ਼ ਕੀਤਾ ਜਾ ਰਿਹਾ ਹੈ
