Biden Begins Formal Transition: ਡੋਨਾਲਡ ਟਰੰਪ ਨੇ ਅਮਰੀਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਜੋ ਬਾਇਡੇਨ ਨੂੰ ਸੱਤਾ ਸੌਂਪਣ ਲਈ ਸਹਿਮਤੀ ਦੇ ਦਿੱਤੀ ਹੈ। ਹਾਲਾਂਕਿ ਟਰੰਪ ਨੇ ਆਪਣੀ ਲੜਾਈ ਜਾਰੀ ਰੱਖਣ ਦੀ ਗੱਲ ਵੀ ਕੀਤੀ ਹੈ । ਇੱਕ ਰਿਪੋਰਟ ਅਨੁਸਾਰ ਅਮਰੀਕਾ ਦੀ ਮਹੱਤਵਪੂਰਨ ਸਰਕਾਰੀ ਸੰਸਥਾ ‘ਦਿ ਜਨਰਲ ਸਰਵਿਸ ਐਡਮਨਿਸਟ੍ਰੇਸ਼ਨ’ (GSA) ਨੇ ਜੋ ਬਾਇਡੇਨ ਨੂੰ ਸੂਚਿਤ ਕੀਤਾ ਹੈ ਕਿ ਟਰੰਪ ਪ੍ਰਸ਼ਾਸਨ ਸੱਤਾ ਤਬਦੀਲ ਕਰਨ ਲਈ ਤਿਆਰ ਹੈ । ਜੀਐਸਏ ਅਮਰੀਕਾ ਵਿੱਚ ਸੱਤਾ ਤਬਦੀਲ ਕਰਨ ਲਈ ਜ਼ਿੰਮੇਵਾਰ ਹੈ। ਜੀਐਸਏ ਦੇ ਪ੍ਰਸ਼ਾਸਕ ਐਮਿਲੀ ਮੁਫੀ ਵੱਲੋਂ ਬਾਇਡੇਨ ਨੂੰ ਭੇਜੇ ਇੱਕ ਪੱਤਰ ਦੀ ਇੱਕ ਕਾਪੀ ਵੀ ਮਿਲੀ ਹੈ।
ਚੋਣਾਂ ਵਿੱਚ ਬਾਇਡੇਨ ਨੂੰ ਜੇਤੂ ਐਲਾਨੇ ਜਾਣ ਤੋਂ ਦੋ ਹਫ਼ਤੇ ਬਾਅਦ ਸਾਹਮਣੇ ਆਏ ਪੱਤਰ ਵਿੱਚ ਜੋ ਬਾਇਡੇਨ ਦੀ ਜਿੱਤ ‘ਤੇ ਅਧਿਕਾਰਿਕ ਮੋਹਰ ਲਗਾਈ ਗਈ ਹੈ । ਮਫੀ ਨੇ ਕਿਹਾ ਹੈ ਕਿ ਵ੍ਹਾਈਟ ਹਾਊਸ ਵੱਲੋਂ ਉਨ੍ਹਾਂ ‘ਤੇ ਕੋਈ ਦਬਾਅ ਨਹੀਂ ਹੈ ਅਤੇ ਉਨ੍ਹਾਂ ਨੇ ਕਿਸੇ ਡਰ ਜਾਂ ਹਿਮਾਇਤ ਕਾਰਨ ਇਹ ਫੈਸਲਾ ਨਹੀਂ ਲਿਆ ਹੈ । ਮਫੀ ਨੇ ਕਿਹਾ, ਮੈਂ ਇਹ ਫੈਸਲਾ ਸੁਤੰਤਰ ਤੌਰ ‘ਤੇ ਲਿਆ ਹੈ, ਇਹ ਕਾਨੂੰਨ ਅਤੇ ਮੌਜੂਦ ਤੱਥਾਂ’ ‘ਤੇ ਅਧਾਰਿਤ ਹੈ। ਮੇਰੇ ਫੈਸਲੇ ਨੂੰ ਲੈ ਕੇ ਕੋਈ ਦਬਾਅ ਨਹੀਂ ਪਾਇਆ ਗਿਆ, ਨਾ ਤਾਂ ਵ੍ਹਾਈਟ ਹਾਊਸ ਅਤੇ ਨਾ ਹੀ GSA ਨੇ। ਹਾਲਾਂਕਿ, ਦੂਜੇ ਪਾਸੇ ਟਰੰਪ ਨੇ ਕਿਹਾ ਹੈ ਕਿ ਉਸਨੇ ਖ਼ੁਦ ਜੀਐਸਏ ਤੋਂ ਲੋੜੀਂਦੀਆਂ ਰਸਮਾਂ ਪੂਰੀਆਂ ਕਰਨ ਦੀ ਸਿਫਾਰਸ਼ ਕੀਤੀ ਹੈ।
ਇਸ ਪੱਤਰ ਦੇ ਬਾਅਦ ਟਰੰਪ ਨੇ ਵੀ ਟਵੀਟ ਕਰਕੇ ਐਮਿਲੀ ਮਫੀ ਦਾ ਧੰਨਵਾਦ ਕੀਤਾ ਹੈ । ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਮਫੀ ‘ਤੇ ਬਹੁਤ ਦਬਾਅ ਪਾਇਆ ਗਿਆ ਸੀ ਕਿ ਉਹ ਸੱਤਾ ਦੇ ਤਬਾਦਲੇ ਦੀ ਪ੍ਰਕਿਰਿਆ ਸ਼ੁਰੂ ਹੋਣ ਦੇਣ । ਟਰੰਪ ਨੇ ਟਵੀਟ ਕੀਤਾ, ਮੈਂ GSA ਦੀ ਐਮਿਲੀ ਮਫੀ ਨੂੰ ਦੇਸ਼ ਪ੍ਰਤੀ ਉਨ੍ਹਾਂ ਦੀ ਵਫ਼ਾਦਾਰੀ ਅਤੇ ਸਮਰਪਣ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ । ਉਨ੍ਹਾਂ ਨੂੰ ਤਸੀਹੇ ਦਿੱਤੇ ਗਏ, ਧੱਕੇਸ਼ਾਹੀ ਕੀਤੀ ਗਈ ਅਤੇ ਬਦਸਲੂਕੀ ਕੀਤੀ ਗਈ ਅਤੇ ਮੈਂ ਉਨ੍ਹਾਂ ਤੇ ਉਨ੍ਹਾਂ ਦੇ ਪਰਿਵਾਰਾਂ ਅਤੇ ਜੀਐਸਏ ਕਰਮਚਾਰੀਆਂ ਨਾਲ ਇਹ ਸਭ ਵਾਪਰਦਾ ਨਹੀਂ ਵੇਖਣਾ ਚਾਹੁੰਦਾ । ਸਾਡਾ ਕੇਸ ਮਜ਼ਬੂਤ ਹੈ ਅਤੇ ਅਸੀਂ ਆਪਣੀ ਲੜਾਈ ਜਾਰੀ ਰੱਖਾਂਗੇ ਅਤੇ ਮੈਨੂੰ ਯਕੀਨ ਹੈ ਕਿ ਅਸੀਂ ਜਿੱਤ ਹਾਸਿਲ ਕਰਾਂਗੇ। ਇਸ ਦੇ ਬਾਵਜੂਦ, ਦੇਸ਼ ਦੇ ਹਿੱਤ ਵਿਚ, ਮੈਂ ਐਮਿਲੀ ਅਤੇ ਉਸ ਦੀ ਟੀਮ ਨੂੰ ਪ੍ਰੋਟੋਕੋਲ ਨੂੰ ਪੂਰਾ ਕਰਨ ਲਈ ਜ਼ਰੂਰੀ ਰਸਮਾਂ ਪੂਰੀਆਂ ਕਰਨ ਦੀ ਸਿਫਾਰਸ਼ ਕਰ ਰਿਹਾ ਹਾਂ।
ਦੱਸ ਦੇਈਏ ਕਿ ਬਾਇਡੇਨ ਦੀ ਜਿੱਤ ਦੀ ਪੁਸ਼ਟੀ ਕਰਨ ਵਾਲਾ ਇਹ ਪੱਤਰ ਅਜਿਹੇ ਸਮੇਂ ਭੇਜਿਆ ਗਿਆ ਹੈ ਜਦੋਂ ਟਰੰਪ ਦੇ ਚੋਣ ਨਤੀਜਿਆਂ ਨੂੰ ਚੁਣੌਤੀ ਦੇਣ ਵਾਲੀਆਂ ਕਈ ਪਟੀਸ਼ਨਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ ਅਤੇ ਜ਼ਿਆਦਾਤਰ ਰਾਜਾਂ ਨੇ ਚੋਣ ਨਤੀਜਿਆਂ ‘ਤੇ ਮੋਹਰ ਲਾ ਦਿੱਤੀ ਹੈ । ਮਿਸ਼ੀਗਨ ਨੇ ਅਧਿਕਾਰਤ ਤੌਰ ‘ਤੇ ਚੋਣ ਨਤੀਜਿਆਂ’ ਤੇ ਮੋਹਰ ਲਗਾ ਦਿੱਤੀ ਹੈ। ਜਾਰਜੀਆ ਨੇ ਵੀ ਸ਼ੁੱਕਰਵਾਰ ਨੂੰ ਚੋਣ ਨਤੀਜਿਆਂ ਦੀ ਪੁਸ਼ਟੀ ਕੀਤੀ ਅਤੇ ਪੈਨਸਿਲਵੇਨੀਆ ਵੀ ਅਧਿਕਾਰਤ ਤੌਰ ‘ਤੇ ਨਤੀਜਿਆਂ ਦੀ ਪੁਸ਼ਟੀ ਕਰਨ ਦੇ ਨੇੜੇ ਹੈ।
ਇਹ ਵੀ ਦੇਖੋ: Bapu Balkaur Singh ਨੇ Modi ਨੂੰ ਚਾਹ ਹੀ ਵੇਚਣ ਦੀ ਦਿੱਤੀ ਸਲਾਹ
