ਯੂਰਪ ਦੇ ਕਈ ਦੇਸ਼ਾਂ ਨੂੰ ਅਚਾਨਕ ਭਾਰੀ ਬਿਜਲੀ ਸੰਕਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਦਰਅਸਲ ਸਪੇਨ ਅਤੇ ਪੁਰਤਗਾਲ ਸਮੇਤ ਕਈ ਖੇਤਰਾਂ ਵਿੱਚ ਪੂਰੀ ਤਰ੍ਹਾਂ ਬਲੈਕਆਊਟ ਦੇਖਿਆ ਗਿਆ, ਜਿਸ ਨਾਲ ਹਵਾਈ ਸੇਵਾਵਾਂ ਤੋਂ ਲੈ ਕੇ ਮਹਾਨਗਰਾਂ ਤੱਕ ਦੇ ਕੰਮਕਾਜ ‘ਤੇ ਅਸਰ ਪਿਆ। ਦੁਪਹਿਰ ਵੇਲੇ, ਮੈਡ੍ਰਿਡ ਤੋਂ ਲਿਸਬਨ ਤੱਕ ਦੇ ਵੱਡੇ ਖੇਤਰ ਹਨੇਰੇ ਵਿੱਚ ਡੁੱਬ ਗਏ। ਦੋਵਾਂ ਦੇਸ਼ਾਂ ਨੇ ਇਸ ਐਮਰਜੈਂਸੀ ਨਾਲ ਨਜਿੱਠਣ ਲਈ ਤੁਰੰਤ ਪ੍ਰੋਟੋਕੋਲ ਲਾਗੂ ਕਰ ਦਿੱਤੇ ਹਨ। ਫਿਲਹਾਲ ਇਸ ਦੇ ਪਿੱਛੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਸਾਈਬਰ ਹਮਲਾ ਵੀ ਹੋ ਸਕਦਾ ਹੈ।
ਸਪੇਨ ਦੇ ਰਾਸ਼ਟਰੀ ਗਰਿੱਡ ਆਪਰੇਟਰ ‘ਰੈੱਡ ਇਲੈਕਟ੍ਰਿਕਾ’ ਨੇ ਇਕ ਬਿਆਨ ਜਾਰੀ ਕਰਕੇ ਕਿਹਾ ਕਿ ਦੇਸ਼ ਭਰ ‘ਚ ਬਿਜਲੀ ਸਪਲਾਈ ਬਹਾਲ ਕਰਨ ਲਈ ਸੈਕਟਰ ਕੰਪਨੀਆਂ ਦੇ ਸਹਿਯੋਗ ਨਾਲ ਕਈ ਠੋਸ ਕਦਮ ਚੁੱਕੇ ਜਾ ਰਹੇ ਹਨ। ਇਸ ਦੇ ਨਾਲ ਹੀ ਪੁਰਤਗਾਲ ਦੇ ਗਰਿੱਡ ਆਪਰੇਟਰ ‘ਈ-ਰੇਡਜ਼’ ਨੇ ਕਿਹਾ ਕਿ ਯੂਰਪੀ ਪਾਵਰ ਗਰਿੱਡ ‘ਚ ਖਰਾਬੀ ਕਾਰਨ ਇਹ ਸੰਕਟ ਪੈਦਾ ਹੋਇਆ ਹੈ। ਸ਼ੁਰੂਆਤੀ ਜਾਂਚ ‘ਚ ਵੋਲਟੇਜ ਅਸੰਤੁਲਨ ਨੂੰ ਮੁੱਖ ਕਾਰਨ ਮੰਨਿਆ ਜਾ ਰਿਹਾ ਹੈ, ਜਿਸ ਕਾਰਨ ਬਿਜਲੀ ਪ੍ਰਣਾਲੀ ਪੂਰੀ ਤਰ੍ਹਾਂ ਠੱਪ ਹੋ ਗਈ।
ਬਲੈਕਆਊਟ ਕਾਰਨ ਸਭ ਕੁਝ ਠੱਪ ਹੈ
ਬਲੈਕਆਊਟ ਕਾਰਨ ਟ੍ਰੈਫਿਕ ਲਾਈਟਾਂ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਅਤੇ ਮੈਟਰੋ ਸੇਵਾਵਾਂ ਠੱਪ ਹੋ ਗਈਆਂ, ਜਿਸ ਕਾਰਨ ਸੜਕਾਂ ‘ਤੇ ਹਫੜਾ-ਦਫੜੀ ਮਚ ਗਈ। ਹਸਪਤਾਲਾਂ ਵਿੱਚ ਜ਼ਰੂਰੀ ਸੇਵਾਵਾਂ ਬੈਕਅੱਪ ਜਨਰੇਟਰਾਂ ਦੀ ਮਦਦ ਨਾਲ ਚਲਾਈਆਂ ਜਾ ਰਹੀਆਂ ਹਨ, ਪਰ ਅਧਿਕਾਰੀਆਂ ਨੇ ਹਸਪਤਾਲ ਦੇ ਸਟਾਫ਼ ਨੂੰ ਕੰਪਿਊਟਰ ਬੰਦ ਕਰਨ ਅਤੇ ਬਿਜਲੀ ਬਚਾਉਣ ਲਈ ਹੋਰ ਉਪਾਅ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਫਿਲਹਾਲ, ਇਹ ਸਪੱਸ਼ਟ ਨਹੀਂ ਹੈ ਕਿ ਇਹ ਸੰਕਟ ਕਦੋਂ ਤੱਕ ਜਾਰੀ ਰਹੇਗਾ। ਸਥਿਤੀ ਨੂੰ ਸੰਭਾਲਣ ਲਈ ਸਪੇਨ ਵਿੱਚ ਇੱਕ ਸੰਕਟ ਪ੍ਰਬੰਧਨ ਕਮੇਟੀ ਦਾ ਗਠਨ ਕੀਤਾ ਗਿਆ ਹੈ।
ਸਾਈਬਰ ਹਮਲੇ ਦੀ ਵੀ ਸੰਭਾਵਨਾ
ਸਪੇਨ ਦੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਅਜੇ ਤੱਕ ਬਲੈਕਆਊਟ ਦਾ ਕਾਰਨ ਸਾਈਬਰ ਹਮਲੇ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਹੈ। ਇਸ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਤੋਂ ਪਹਿਲਾਂ ਵੀ ਯੂਰਪ ਵਿਚ ਮਾਮੂਲੀ ਤਕਨੀਕੀ ਖਾਮੀਆਂ ਕਾਰਨ ਵੱਡੇ ਬਲੈਕਆਊਟ ਹੋ ਚੁੱਕੇ ਹਨ। 2003 ਵਿੱਚ, ਸਵਿਟਜ਼ਰਲੈਂਡ ਵਿੱਚ ਇੱਕ ਦਰੱਖਤ ਤੋਂ ਬਿਜਲੀ ਦੀ ਲਾਈਨ ਕੱਟਣ ਕਾਰਨ ਪੂਰਾ ਇਟਲੀ ਹਨੇਰੇ ਵਿੱਚ ਡੁੱਬ ਗਿਆ ਸੀ। ਇਸ ਲਈ ਇਸ ਵਾਰ ਵੀ ਤਕਨੀਕੀ ਖਰਾਬੀ ਜਾਂ ਸਾਈਬਰ ਹਮਲੇ ਦੀਆਂ ਦੋਹਾਂ ਸੰਭਾਵਨਾਵਾਂ ਨੂੰ ਧਿਆਨ ‘ਚ ਰੱਖ ਕੇ ਜਾਂਚ ਕੀਤੀ ਜਾ ਰਹੀ ਹੈ।
ਇਹ ਵੀ ਪੜ੍ਹੋ : OTT ਤੇ ਸੋਸ਼ਲ ਮੀਡੀਆ ਪੇਲਟਫਾਰਮਾਂ ‘ਤੇ ਅ.ਸ਼ਲੀ/ਲ ਕੰਟੈਂਟ! ਸੁਪਰੀਮ ਕੋਰਟ ਨੇ ਵਿਖਾਈ ਸਖਤੀ
ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ, ਸਪੇਨ ਦੇ ਪ੍ਰਸ਼ਾਸਨ ਨੇ ਆਮ ਲੋਕਾਂ ਨੂੰ ਐਮਰਜੈਂਸੀ ਸੇਵਾਵਾਂ ਨੂੰ ਬੇਲੋੜੀਆਂ ਕਾਲਾਂ ਨਾ ਕਰਨ ਦੀ ਅਪੀਲ ਕੀਤੀ ਹੈ, ਕਿਉਂਕਿ ਟੈਲੀਫੋਨ ਸੈਂਟਰ ਪਹਿਲਾਂ ਹੀ ਕਾਲਾਂ ਨਾਲ ਭਰੇ ਹੋਏ ਹਨ। ਯੂਰਪੀਅਨ ਕਮਿਸ਼ਨ ਨੇ ਸਾਲਾਂ ਤੋਂ ਦੇਸ਼ਾਂ ਵਿਚਕਾਰ ਬਿਹਤਰ ਊਰਜਾ ਪ੍ਰਣਾਲੀ ਏਕੀਕਰਣ ਦੀ ਜ਼ਰੂਰਤ ‘ਤੇ ਜ਼ੋਰ ਦਿੱਤਾ ਹੈ, ਪਰ ਤਰੱਕੀ ਹੌਲੀ ਰਹੀ ਹੈ। ਮੌਜੂਦਾ ਸੰਕਟ ਨੇ ਇੱਕ ਵਾਰ ਫਿਰ ਯੂਰਪ ਨੂੰ ਇਸ ਦਿਸ਼ਾ ਵਿੱਚ ਗੰਭੀਰਤਾ ਨਾਲ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ।
ਵੀਡੀਓ ਲਈ ਕਲਿੱਕ ਕਰੋ -:
