1.5 lakh blown up : ਜਲੰਧਰ : ਪੰਜਾਬ ਵਿੱਚ ਸਾਈਬਰ ਕ੍ਰਾਈਮ ਲਗਾਤਾਰ ਵਧਦਾ ਹੀ ਜਾ ਰਿਹਾ ਹੈ, ਜਿਥੇ ਸਾਈਬਰ ਠੱਗ ਫੋਨ ‘ਤੇ ਲੋਕਾਂ ਨੂੰ ਆਪਣੀਆਂ ਗੱਲਾਂ ’ਚ ਫਸਾ ਕੇ ਪਹਿਲਾਂ ਓਟੀਪੀ ਜਾਂ ਬੈਂਕ ਡਿਟੇਲ ਲੈ ਲੈਂਦੇ ਹਨ ਅਤੇ ਫਿਰ ਉਨ੍ਹਾਂ ਦੇ ਅਕਾਊਂਟ ਵਿੱਚੋਂ ਪੈਸੇ ਉਡਾ ਲੈਂਦੇ ਹਨ। ਪਰ ਜਲੰਧਰ ਵਿੱਚ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਥੇ ਠੱਗਾਂ ਨੇ ਨਾ ਤਾਂ ਓਟੀਪੀ ਮੰਗਿਆ ਅਤੇ ਨਾ ਹੀ ਕੋਈ ਬੈਂਕ ਡਿਟੇਲ ਲਈ ਅਤੇ ਫਿਰ ਵੀ ਇੱਕ ਹੌਲਦਾਰ ਦੇ ਅਕਾਊਂਟ ਵਿੱਚੋਂ ਲਗਭਗ ਡੇਢ ਲੱਖ ਰੁਪਏ ਗਾਇਬ ਹੋ ਗਏ। ਮਿਲੀ ਜਾਣਕਾਰੀ ਮੁਤਾਬਕ ਫੌਜ ਵਿੱਚ ਤਾਇਨਾਤ ਮਕਸੂਦਾਂ ਚੌਂਕ ਆਰਮੀ ਕੁਆਰਟਰ ਦੇ ਵਸਨੀਕ ਹੌਲਦਾਰ ਉਮੇਸ਼ ਚੰਦਰ ਨੇਗੀ ਦਾ ਅਕਾਊਂਟ ਹੈਕ ਕਰਕੇ ਲਗਭਗ ਡੇਢ ਲੱਖ ਰੁਪਏ ਕੱਢ ਲਏ ਗਏ। ਨੇਗੀ ਨੇ ਇਸ ਦੀ ਸ਼ਿਕਾਇਤ ਥਾਣਾ ਨੰਬਰ ਇੱਕ ਨੂੰ ਦਿੱਤੀ ਹੈ।
ਉਮੇਸ਼ ਚੰਦਰ ਨੇਗੀ ਦੀ ਧੀ ਮੋਨਿਕਾ ਨੇ ਦੱਸਿਆ ਕਿ ਉਹ ਐਲਪੀਯੂ ਵਿੱਚ ਪੜ੍ਹਦੀ ਹੈ। ਹਾਲ ਹੀ ਵਿਚ ਉਸ ਦੇ ਛੋਟੇ ਭਰਾ ਨੇ ਫੀਸ ਜਮ੍ਹਾ ਕਰਵਾਉਣੀ ਸੀ, ਫਿਰ ਉਸ ਦੇ ਪਿਤਾ ਏਟੀਐਮ ਤੋਂ 21 ਹਜ਼ਾਰ ਰੁਪਏ ਕਢਵਾਉਣ ਗਏ, ਪਰ ਉਥੇ ਕੋਈ ਬਕਾਇਆ ਨਹੀਂ ਸੀ। ਇਸ ਤੋਂ ਬਾਅਦ ਬੈਂਕ ਵਿੱਚ ਜਾਣ ਤੋਂ ਬਾਅਦ, ਇਹ ਪਾਇਆ ਗਿਆ ਕਿ ਉਨ੍ਹਾਂ ਦੇ ਪਿਤਾ ਦੇ ਖਾਤੇ ਦੀ ਯੂਪੀਆਈ ਪਹਿਲਾਂ ਤੋਂ ਹੀ ਸੈੱਟ ਸੀ ਅਤੇ ਬੈਂਕ ਵਾਲਿਆਂ ਦਾ ਕਹਿਣਾ ਹੈ ਕਿ ਉਮੇਸ਼ ਚੰਦਰ ਨੇ ਓਟੀਪੀ ਕਿਸੇ ਨਾਲ ਸ਼ੇਅਰ ਕੀਤਾ ਹੋਵੇਗਾ, ਜਿਸ ਤੋਂ ਬਾਅਦ ਪੈਸੇ ਨਿਕਲ ਰਹੇ ਹਨ, ਜਦਕਿ ਉਮੇਸ਼ ਚੰਦਰ ਦਾ ਕਹਿਣਾ ਹੈ ਕਿ ਉਸ ਨੇ ਕਿਸੇ ਨੂੰ ਵੀ ਓਟੀਪੀ ਸ਼ੇਅਰ ਨਹੀਂ ਕੀਤਾ। ਇਸ ਸੰਬੰਧੀ ਥਾਣਾ ਇੰਚਾਰਜ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਸ਼ਿਕਾਇਤ ਆਈ ਹੈ ਅਤੇ ਸਾਈਬਰ ਸੈੱਲ ਨੂੰ ਭੇਜ ਦਿੱਤੀ ਜਾਵੇਗੀ।
