ਸਪੇਨ ਦੀ 50 ਸਾਲਾ ਐਥਲੀਟ ਬੀਟਰਿਜ਼ ਫਲੈਮਿਨੀ 500 ਦਿਨ ਗੁਫਾ ‘ਚ ਰਹਿਣ ਤੋਂ ਬਾਅਦ ਬਾਹਰ ਆਈ ਹੈ। ਇਸ ਨਾਲ ਉਨ੍ਹਾਂ ਦਾ ਨਾਂ ਗਿਨੀਜ਼ ਬੁੱਕ ਆਫ ਵਰਲਡ ਰਿਕਾਰਡਜ਼ ‘ਚ ਦਰਜ ਹੋ ਗਿਆ ਹੈ। ਫਲੈਮਿਨੀ ਗ੍ਰੇਨਾਡਾ ਸ਼ਹਿਰ ਦੇ ਨੇੜੇ 230 ਫੁੱਟ ਡੂੰਘੀ ਗੁਫਾ ਵਿੱਚ ਰਹਿ ਰਹੀ ਸੀ। ਇਸ ਸਮੇਂ ਦੌਰਾਨ ਉਸ ਦਾ ਬਾਹਰੀ ਦੁਨੀਆ ਨਾਲ ਕੋਈ ਸੰਪਰਕ ਨਹੀਂ ਸੀ। ਬਾਹਰ ਆਉਣ ਤੋਂ ਬਾਅਦ ਬੀਟਰਿਜ਼ ਨੇ ਪ੍ਰੈੱਸ ਕਾਨਫਰੰਸ ਕੀਤੀ।
ਬੀਟਰਿਜ਼ ਨੇ ਪ੍ਰੈੱਸ ਕਾਨਫਰੰਸ ‘ਚ ਦੱਸਿਆ ਕਿ ਜਦੋਂ ਉਸ ਦੀ ਟੀਮ 500 ਦਿਨ ਪੂਰੇ ਕਰਨ ਮਗਰੋਂ ਉਸ ਨੂੰ ਲੈਣ ਆਈ ਤਾਂ ਉਹ ਸੁੱਤੀ ਪਈ ਸੀ। ਉਸ ਨੂੰ ਪਤਾ ਨਹੀਂ ਸੀ ਕਿ ਉਸ ਦਾ ਟੀਚਾ ਪੂਰਾ ਹੋ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਗੁਫਾ ‘ਚ ਕਸਰਤ, ਪੇਂਟਿੰਗ, ਡਰਾਇੰਗ ਅਤੇ ਟੋਪੀਆਂ ਬੁਣਨ ਦਾ ਕੰਮ ਕਰਦੀ ਸੀ। ਇਸ ਤੋਂ ਇਲਾਵਾ ਉਸਨੇ 60 ਕਿਤਾਬਾਂ ਪੜ੍ਹੀਆਂ ਅਤੇ 1000 ਲੀਟਰ ਪਾਣੀ ਵੀ ਪੀਤਾ।
ਬੀਟਰਿਜ਼ ਨੇ ਦੱਸਿਆ ਸ਼ੁਰੂ ਵਿਚ ਉਹ ਹਰ ਰੋਜ਼ ਦਿਨ ਗਿਣਦੀ ਸੀ। ਪਰ ਫਿਰ 65 ਦਿਨਾਂ ਬਾਅਦ ਉਨ੍ਹਾਂ ਨੇ ਅਜਿਹਾ ਕਰਨਾ ਬੰਦ ਕਰ ਦਿੱਤਾ। ਉਸ ਨੇ ਕਿਹਾ ਕਿ ਹੋਰ ਪ੍ਰਾਜੈਕਟ ਸ਼ੁਰੂ ਕਰਨ ਤੋਂ ਪਹਿਲਾਂ ਉਹ ਡਾਕਟਰ ਕੋਲ ਜਾਵੇਗੀ ਤਾਂ ਜੋ ਉਸ ਦੇ ਸਰੀਰ ਅਤੇ ਦਿਮਾਗ ਵਿਚ ਆ ਰਹੀਆਂ ਤਬਦੀਲੀਆਂ ਦਾ ਅਧਿਐਨ ਕੀਤਾ ਜਾ ਸਕੇ।
ਜਦੋਂ ਫਲਾਮਿਨੀ ਗੁਫਾ ਵਿਚ ਗਈ ਤਾਂ ਉਸ ਦੀ ਉਮਰ 48 ਸਾਲ ਸੀ। ਉਸ ਨੇ ਇਹ ਚੁਣੌਤੀ 20 ਨਵੰਬਰ 2021 ਨੂੰ ਸ਼ੁਰੂ ਕੀਤੀ ਸੀ। ਫਲੈਮਿਨੀ ਦੀ ਟੀਮ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਭ ਤੋਂ ਲੰਬੇ ਗੁਫਾ ਰੁਕਣ ਦਾ ਪੁਰਾਣਾ ਰਿਕਾਰਡ ਤੋੜ ਦਿੱਤਾ ਹੈ। ਇਸ ਕੰਮ ਦਾ ਉਦੇਸ਼ ਸਵੇਰੇ ਉੱਠਣ ਤੋਂ ਲੈ ਕੇ ਰਾਤ ਨੂੰ ਸੌਣ ਤੱਕ ਮਨੁੱਖੀ ਦਿਮਾਗ ਅਤੇ ਇਸਦੀ ਸਾਰੀ ਪ੍ਰਕਿਰਿਆ ਦੀ ਨਿਗਰਾਨੀ ਕਰਨਾ ਸੀ। ਇਸ ਨੂੰ ਸਰਕੇਡੀਅਨ ਰਿਦਮ ਕਿਹਾ ਜਾਂਦਾ ਹੈ।
ਇਹ ਵੀ ਪੜ੍ਹੋ : ਰਾਹੁਲ ਗਾਂਧੀ ਨੂੰ ਅਦਾਲਤ ਤੋਂ ਮਿਲੀ ਰਾਹਤ, ਮਾਣਹਾਨੀ ਕੇਸ ‘ਚ ਪੇਸ਼ੀ ਲਈ ਸਥਾਈ ਛੋਟ
ਚੁਣੌਤੀ ਦੌਰਾਨ ਮਨੋਵਿਗਿਆਨੀਆਂ, ਖੋਜਕਰਤਾਵਾਂ, ਟ੍ਰੇਨਰਾਂ ਅਤੇ ਗੁਫਾ ਮਾਹਿਰਾਂ ਦੀ ਟੀਮ ਦੁਆਰਾ ਫਲੈਮਿਨੀ ਦੀ ਨਿਗਰਾਨੀ ਕੀਤੀ ਗਈ। ਇਸ ਦੌਰਾਨ ਉਹ ਇਹ ਜਾਣਨ ਦੀ ਕੋਸ਼ਿਸ਼ ਕਰ ਰਹੇ ਸੀ ਕਿ ਸਮਾਜਿਕ ਅਲੱਗ-ਥਲੱਗ ਹੋਣ ਦੌਰਾਨ ਮਨੁੱਖੀ ਮਨ ਅਤੇ ਨੀਂਦ ਦੇ ਪੈਟਰਨ ਵਿੱਚ ਕੀ ਬਦਲਾਅ ਆਉਂਦੇ ਹਨ। ਟਾਸਕ ਦੇ ਵਿਚਕਾਰ, ਫਲਾਮਿਨੀ 8 ਦਿਨਾਂ ਲਈ ਇੱਕ ਵਾਰ ਬਾਹਰ ਆਈ।
ਦਰਅਸਲ, ਉਹ ਰਾਊਟਰ ਰਾਹੀਂ ਗੁਫਾ ਦੇ ਅੰਦਰੋਂ ਆਡੀਓ-ਵੀਡੀਓ ਭੇਜਦੀ ਸੀ। ਪਰ ਟਾਸਕ ਦੇ ਵਿਚਕਾਰ ਹੀ ਉਸ ਦਾ ਰਾਊਟਰ ਖਰਾਬ ਹੋ ਗਿਆ। ਇਸ ਕਾਰਨ ਉਸ ਨੂੰ ਗੁਫਾ ਤੋਂ ਬਾਹਰ ਆਉਣਾ ਪਿਆ। ਟੀਮ ਨੇ ਦੱਸਿਆ ਕਿ ਬਾਹਰ ਆਉਣ ਤੋਂ ਬਾਅਦ ਫਲਾਮਿਨੀ ਨੇ ਆਪਣੇ ਆਪ ਨੂੰ 8 ਦਿਨਾਂ ਲਈ ਇਕ ਟੈਂਟ ਵਿਚ ਅਲੱਗ ਕਰ ਲਿਆ ਸੀ ਤਾਂ ਜੋ ਉਸ ਦੀ ਚੁਣੌਤੀ ‘ਤੇ ਸਵਾਲ ਨਾ ਉੱਠ ਸਕਣ।
ਵੀਡੀਓ ਲਈ ਕਲਿੱਕ ਕਰੋ -:
“ਪੰਜਾਬ ਦੀ ਆਹ ਕੁੜੀ ਨੇ ਬੁਲਟ ‘ਤੇ ਘੁੰਮਿਆ ਸਾਰਾ ‘India’, ਹੁਣ ਬੁਲਟ ‘ਤੇ ਚੱਲੀ ਐ ਇੰਗਲੈਂਡ ! “
