ਲੁਧਿਆਣਾ ਦੇ ਸਰਾਫਾ ਬਾਜ਼ਾਰ ‘ਚ ਇਕ ਸੋਨੇ ਦੇ ਕਾਰੀਗਰ ਨੇ ਇਕ ਸੁਨਿਆਰੇ ਦੀ ਦੁਕਾਨ ‘ਚੋਂ ਲੱਖਾਂ ਰੁਪਏ ਦੇ ਗਹਿਣੇ ਚੋਰੀ ਕਰਕੇ ਫਰਾਰ ਹੋ ਗਿਆ। ਸਾਰੀ ਘਟਨਾ ਸੀਸੀਟੀਵੀ ਕੈਮਰਿਆਂ ਵਿੱਚ ਵੀ ਕੈਦ ਹੋ ਗਈ। ਜਦੋਂ ਦੁਕਾਨਦਾਰ ਨੇ ਗਹਿਣਿਆਂ ਦੇ ਡੱਬੇ ਖੁੱਲ੍ਹੇ ਦੇਖੇ ਤਾਂ ਉਸ ਨੇ ਤੁਰੰਤ ਥਾਣਾ ਡਵੀਜ਼ਨ ਨੰਬਰ 4 ਦੀ ਪੁਲਿਸ ਨੂੰ ਸੂਚਿਤ ਕੀਤਾ। ਪੁਲਿਸ ਵੱਲੋਂ ਦੋਸ਼ੀ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।
ਜਾਣਕਾਰੀ ਮੁਤਾਬਕ ਜਦੋਂ ਦੁਕਾਨ ਮਾਲਕ ਨਸੀਮ ਨੂੰ ਦੁਕਾਨ ‘ਚ ਚੋਰੀ ਹੋਣ ਦਾ ਪਤਾ ਲੱਗਾ ਤਾਂ ਉਸ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ। ਜਦੋਂ ਉਸ ਨੇ ਸੀਸੀਟੀਵੀ ਚੈੱਕ ਕੀਤਾ ਤਾਂ ਪਤਾ ਲੱਗਾ ਕਿ ਅਬੀਰ ਨੇ ਗਹਿਣੇ ਚੋਰੀ ਕੀਤੇ ਹਨ। ਸ਼ਾਤਿਰ ਨੌਜਵਾਨ ਨੇ ਲਗਭਗ 45 ਲੱਖ ਦਾ ਸੋਨਾ ਚੋਰੀ ਕੀਤਾ। ਘਟਨਾ ਤੋਂ ਬਾਅਦ ਸਰਾਫਾ ਬਾਜ਼ਾਰ ਦੇ ਵਪਾਰੀਆਂ ‘ਚ ਡਰ ਦਾ ਮਾਹੌਲ ਹੈ।
ਨਸੀਮ ਨੇ ਦੱਸਿਆ ਕਿ ਉਹ ਮੂਲ ਰੂਪ ਤੋਂ ਕਲਕੱਤਾ ਦਾ ਰਹਿਣ ਵਾਲਾ ਹੈ। ਇੱਥੇ ਉਹ ਸੋਨੇ ਦੇ ਗਹਿਣੇ ਬਣਾਉਣ ਦਾ ਕੰਮ ਕਰਦਾ ਹੈ। ਬਹੁਤ ਸਾਰੇ ਵਰਕਰ ਉਸ ਲਈ ਕੰਮ ਕਰਦੇ ਹਨ। ਉਸ ਨੂੰ ਕੁਝ ਦਿਨ ਪਹਿਲਾਂ ਆਪਣੇ ਦੋਸਤ ਸਾਹਿਬ ਦਾ ਫੋਨ ਆਇਆ ਸੀ। ਉਸ ਨੇ ਕਿਹਾ ਕਿ ਉਸ ਕੋਲ ਇੱਕ ਕਾਰੀਗਰ ਹੈ ਅਤੇ ਉਸ ਨੂੰ ਰੁਜ਼ਗਾਰ ਦੀ ਲੋੜ ਹੈ। ਉਹ ਭੇਜ ਦੇਵੇਗਾ।
ਐਤਵਾਰ ਨੂੰ ਇਕ ਬੰਦਾ ਕੰਮ ਲਈ ਉਸ ਦੀ ਦੁਕਾਨ ‘ਤੇ ਆਇਆ। ਨਸੀਮ ਨੇ ਸੋਚਿਆ ਕਿ ਸ਼ਾਇਦ ਇਹ ਉਸ ਦੇ ਦੋਸਤ ਨੇ ਭੇਜਿਆ ਸੀ, ਜਦੋਂ ਉਸ ਵਿਅਕਤੀ ਦਾ ਨਾਂ ਪੁੱਛਿਆ ਤਾਂ ਉਸ ਨੇ ਅਬੀਰ ਦੱਸਿਆ। ਨਸੀਮ ਨੇ ਪੁੱਛਿਆ ਕਿ ਉਸ ਨੂ ਸਾਹਿਬ ਨੇ ਭੇਜਿਆ ਸੀ? ਤਾਂ ਉਸ ਨੇ ਹਾਂ ਕਰ ਦਿੱਤੀ। ਇਸ ਤੋਂ ਬਾਅਦ ਨਸੀਮ ਨੇ ਉਸ ਨੂੰ ਦੁਕਾਨ ‘ਤੇ ਕੰਮ ‘ਤੇ ਰੱਖ ਲਿਆ। ਪਰ ਉਸ ਨੇ ਕਿਹਾ ਕਿ ਉਸ ਨੂੰ ਕੰਮ ਨਹੀਂ ਆਉਂਦਾ ਉਹ ਪਹਿਲਾਂ ਸਿੱਖ ਲਏਗਾ, ਇਸ ‘ਤੇ ਨਸੀਮ ਸਹਿਮਤ ਹੋ ਗਿਆ।
ਇਸ ਦੌਰਾਨ ਨਸੀਮ ਆਪਣੇ ਬੱਚੇ ਨੂੰ ਸਕੂਲ ਵਿੱਚ ਦਾਖ਼ਲ ਕਰਵਾਉਣ ਵਿੱਚ ਰੁੱਝ ਗਿਆ। ਸਵੇਰੇ ਜਦੋਂ ਸਾਰੇ ਕਾਰੀਗਰ ਉਠੇ ਤਾਂ ਉਨ੍ਹਾਂ ਦੇਖਿਆ ਕਿ ਉਨ੍ਹਾਂ ਦੇ ਕੰਮ ਵਾਲੀ ਥਾਂ ‘ਤੇ ਇੱਕ ਦਰਾਜ਼ ਦਾ ਤਾਲਾ ਟੁੱਟਿਆ ਹੋਇਆ ਸੀ ਅਤੇ ਬਾਕੀਆਂ ਨੂੰ ਖੋਲ੍ਹਿਆ ਹੋਇਆ ਸੀ। ਇਸ ਵਿੱਚ ਰੱਖਿਆ ਕਰੀਬ ਅੱਧਾ ਕਿਲੋ ਸੋਨਾ, ਜੋ ਕਿ ਲੋਕਾਂ ਦਾ ਸੀ ਅਤੇ ਗਹਿਣੇ ਬਣਾਉਣ ਲਈ ਆਇਆ ਸੀ, ਗਾਇਬ ਸੀ। ਵਰਕਰਾਂ ਨੇ ਇਸ ਬਾਰੇ ਨਸੀਮ ਨੂੰ ਦੱਸਿਆ ਅਤੇ ਫਿਰ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ।
ਨਸੀਮ ਨੇ ਦੱਸਿਆ ਕਿ ਦੋਸ਼ੀ ਚੋਰ ਨੇ ਦੋ ਦਿਨ ਤੱਕ ਸਾਰੇ ਕਰਮਚਾਰੀਆਂ ਅਤੇ ਉਸ ‘ਤੇ ਨਜ਼ਰ ਰੱਖੀ ਅਤੇ ਰੇਕੀ ਕੀਤੀ। ਉਸਨੇ ਜਾਂਚ ਕੀਤੀ ਕਿ ਉਹ ਕਦੋਂ ਸੌਂਦਾ ਹੈ, ਕਦੋਂ ਜਾਗਦਾ ਹੈ ਅਤੇ ਉਸ ਨੇ ਤਾਲੇ ਦੀਆਂ ਚਾਬੀਆਂ ਕਿੱਥੇ ਰੱਖੀਆਂ ਹਨ। ਉਸ ਨੇ ਦੇਖਿਆ ਸੀ ਕਿ ਸਿਰਫ਼ ਇੱਕ ਦਰਾਜ਼ ਨੂੰ ਤਾਲਾ ਲੱਗਿਆ ਹੋਇਆ ਸੀ, ਜਦੋਂ ਕਿ ਬਾਕੀ ਦੀਆਂ ਚਾਬੀਆਂ ਉਨ੍ਹਾਂ ਦੇ ਡੱਬਿਆਂ ਦੇ ਹੇਠਾਂ ਪਈਆਂ ਸਨ।
ਜਦੋਂ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਦੀ ਜਾਂਚ ਕੀਤੀ ਗਈ ਤਾਂ ਦੋਸ਼ੀ ਸਵੇਰੇ ਛੱਤ ’ਤੇ ਬਣੇ ਕਾਰੀਗਰਾਂ ਦੀਆਂ ਪੇਟੀਆਂ ਵਾਲੇ ਕਮਰੇ ਵਿੱਚ ਆਉਂਦਾ ਦੇਖਿਆ ਗਿਆ, ਜਿੱਥੇ ਸੋਨਾ ਰੱਖਿਆ ਹੋਇਆ ਸੀ। ਉਹ ਪਹਿਲਾਂ ਇੱਕ ਪੇਟੀ ਦੇ ਦਰਾਜ਼ ਦਾ ਤਾਲਾ ਤੋੜਦਾ ਹੈ ਅਤੇ ਉਸ ਵਿੱਚੋਂ ਸੋਨਾ ਕੱਢ ਕੇ ਉੱਥੇ ਰੱਖੇ ਇੱਕ ਲਿਫ਼ਾਫ਼ੇ ਵਿੱਚ ਪਾ ਦਿੰਦਾ ਹੈ।
ਇਹ ਵੀ ਪੜ੍ਹੋ : ਮੁੰਬਈ ਹ.ਮ/ਲੇ ਦਾ ਦੋਸ਼ੀ ਤਹੱਵੁਰ ਰਾਣਾ ਪਹੁੰਚਿਆ ਭਾਰਤ, ਵਿਸ਼ੇਸ਼ ਜਹਾਜ਼ ਰਾਹੀਂ ਅਮਰੀਕਾ ਤੋਂ ਲੈ ਕੇ ਆਈ ਟੀਮ
ਇਸ ਤੋਂ ਬਾਅਦ ਉਹ ਹੌਲੀ-ਹੌਲੀ ਦਰਾਜ਼ ਵਿੱਚੋਂ ਬਚੀਆਂ ਚਾਬੀਆਂ ਕੱਢਦਾ ਹੈ, ਤਾਲਾ ਖੋਲ੍ਹਦਾ ਹੈ ਅਤੇ ਸੋਨਾ ਕੱਢ ਲੈਂਦਾ ਹੈ। ਥਾਣਾ ਡਵੀਜ਼ਨ ਨੰਬਰ 4 ਦੇ ਐਸਐਚਓ ਦਲਜੀਤ ਸਿੰਘ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਦੋਸ਼ੀ ਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਕੇਸ ਦਰਜ ਕੀਤਾ ਜਾ ਰਿਹਾ ਹੈ। ਜਲਦੀ ਹੀ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।
ਵੀਡੀਓ ਲਈ ਕਲਿੱਕ ਕਰੋ -:
