ਦਿੱਲੀ ਦੇ ਸਪੈਸ਼ਲ ਸੈੱਲ ਨੇ ਅੰਤਰਰਾਸ਼ਟਰੀ ਡਰੱਗ ਰੈਕੇਟ ਨੂੰ ਬ੍ਰੇਕ ਕਰ ਕੇ 354 ਕਿਲੋਗ੍ਰਾਮ ਉੱਚ ਸ਼ੁੱਧਤਾ ਵਾਲੀ ਹੈਰੋਇਨ ਅਤੇ 100 ਕਿਲੋ ਕੈਮੀਕਲ ਬਰਾਮਦ ਕੀਤਾ ਹੈ, ਜਿਸ ਦੀ ਮਿਕਸਿੰਗ ਕਰਕੇ ਇੱਕ ਕਿਲੋ ਹੈਰੋਇਨ ਨਾਲ ਤਿੰਨ ਕਿਲੋ ਚਿੱਟਾ ਤਿਆਰ ਕੀਤਾ ਜਾਣਾ ਸੀ।
ਮਿਕਸਿੰਗ ਦਾ ਕੰਮ ਮੱਧ ਪ੍ਰਦੇਸ਼ ਦੇ ਸ਼ਿਵਪੁਰੀ ਵਿੱਚ ਹੁੰਦਾ ਸੀ। ਦਿੱਲੀ ਪੁਲਿਸ ਨੇ ਜਲੰਧਰ ਦੇ ਪਿੰਡ ਜਮਸ਼ੇਰ ਖਾਸ ਦੇ ਵਸਨੀਕ ਗੁਰਪ੍ਰੀਤ ਸਿੰਘ ਗੋਪੀ ਅਤੇ ਜਲੰਧਰ ਕੈਂਟ ਦੇ ਮੁਹੱਲਾ ਨੰਬਰ -8 ਗੁਰਜੋਤ ਸਿੰਘ ਗੋਲੂ ਤੋਂ ਇਲਾਵਾ ਅਫਗਾਨ ਨਾਗਰਿਕ ਹਜ਼ਰਤ ਅਲੀ ਅਤੇ ਕਸ਼ਮੀਰੀ ਰਿਜਵਾਨ ਨੂੰ ਗ੍ਰਿਫਤਾਰ ਕੀਤਾ ਹੈ।
ਗੋਲੂ ਜਲੰਧਰ ਦੇ ਪਿੰਡ ਧੀਨਾ ਦਾ ਰਹਿਣ ਵਾਲਾ ਹੈ। ਉਸਦੀ ਮਾਂ ਇੱਕ ਟੀਚਰ ਹੈ ਅਤੇ ਪਿਤਾ ਇੱਕ ਆਟੋ ਚਾਲਕ ਹੈ। ਬਰਾਮਦ ਕੀਤੀ ਗਈ ਖੇਪ ਰੈਕੇਟ ਦੇ ਕਿੰਗਪਿਨ ਅੰਮ੍ਰਿਤਸਰ ਦੇ ਪਿੰਡ ਬਜੀਰ ਭੁੱਲਰ ਦੇ ਰਹਿਣ ਵਾਲੇ ਨਵਪ੍ਰੀਤ ਸਿੰਘ ਨਵ ਨੇ ਭੇਜੀ ਸੀ। ਤਿੰਨ ਗੁਣਾ ਚਿੱਟਾ ਤਿਆਰ ਹੋਣ ਤੋਂ ਬਾਅਦ ਸਪਲਾਈ ਪੰਜਾਬ ਦੇ ਨਾਲ-ਨਾਲ ਦਿੱਲੀ, ਹਰਿਆਣਾ, ਰਾਜਸਥਾਨ, ਜੰਮੂ ਅਤੇ ਦੇਸ਼ ਦੇ ਹੋਰ ਹਿੱਸਿਆਂ ਵਿਚ ਕੀਤੀ ਜਾਣੀ ਸੀ। ਖਦਸ਼ਾ ਹੈ ਕਿ ਨਸ਼ਾ ਸਪਲਾਈ ਦਾ ਕੇਂਦਰ ਜਲੰਧਰ ਹੋਣਾ ਸੀ। ਦਿੱਲੀ ਪੁਲਿਸ ਸ਼ਿਵਪੁਰੀ ਵਿਚ ਮਿਕਸਿੰਗ ਵਾਲੇ ਨੈਟਵਰਕ ਨੂੰ ਕਾਬੂ ਕਰਨ ਲਈ ਪੁੱਛਗਿੱਛ ਕਰ ਰਹੀ ਹੈ।
ਦਿੱਲੀ ਪੁਲਿਸ ਅਨੁਸਾਰ ਅਫਗਾਨਿਸਤਾਨ ਦੇ ਕੁਝ ਹਿੱਸਿਆਂ ਵਿੱਚ ਉਗਾਈ ਗਈ ਅਫੀਮ ਵੱਖ-ਵੱਖ ਜਾਇਜ਼ ਬਰਾਮਦ ਕੀਤੇ ਜਾਣ ਵਾਲੇ ਟਾਕ ਸਟੋਨ, ਜਿਪਸਮ ਪਾਊਡਰ, ਤੁਲਸੀ ਦੇ ਬੀਜ ਅਤੇ ਪੈਕੇਜਿੰਗ ਸਮੱਗਰੀ ਜਿਵੇਂ ਗਨੀ ਬੈਗ ਅਤੇ ਕਾਰਟੂਨ ਆਦਿ ਵਿੱਚ ਲੁਕਾਇਆ ਜਾਂਦਾ ਹੈ। ਇਸ ਤੋਂ ਬਾਅਦ ਕੰਟੇਨਰਾਂ ਵਿਚ ਉਸ ਨੂੰ ਇਰਾਨ ਦੀ ਚਾਬਹਾਰ ਬੰਦਰਗਾਹ ਵਿਚ ਲਿਜਾਇਆ ਜਾਂਦਾ ਹੈ। ਉਥੋਂ ਪਾਬੰਦੀਸ਼ੁਦਾ ਖੇਪ ਜੇਐਨਪੀਟੀ ਜਵਾਹਰ ਲਾਲ ਨਹਿਰੂ ਪੋਰਟ ਟਰੱਸਟ ਮੁੰਬਈ ਨੂੰ ਭੇਜੀ ਜਾਂਦੀ ਹੈ।
ਜ਼ਬਤ ਕੀਤੀ ਗਈ ਹੈਰੋਇਨ ਦੀ ਅੰਤਰਰਾਸ਼ਟਰੀ ਬਾਜ਼ਾਰ ਵਿਚ ਕੀਮਤ ਕਰੀਬ 2.5 ਹਜ਼ਾਰ ਕਰੋੜ ਦੱਸੀ ਜਾ ਰਹੀ ਹੈ। ਪੁਲਿਸ ਨੇ ਹੈਰੋਇਨ ਦੀ ਤਸਕਰੀ ਵਿੱਚ ਦੋ ਕਾਰਾਂ ਅਤੇ ਇੱਕ ਸਕੂਟੀ ਜ਼ਬਤ ਕੀਤੀ ਹੈ। ਗੁਰਜੋਤ ਸਿੰਘ ਗੋਲੂ ਨੇ ਮੰਨਿਆ ਕਿ ਉਹ ਜਲੰਧਰ ਵਿੱਚ ਸਨੈਚਿੰਗ ਕਰਦਾ ਸੀ, ਜਦਕਿ ਗੁਰਪ੍ਰੀਤ ਸਿੰਘ ਗੋਪੀ ਚਿੱਟਾ ਪੀਣ ਦਾ ਆਦੀ ਸੀ। ਜੇਲ੍ਹ ਵਿਚ ਉਹ ਨਵਪ੍ਰੀਤ ਦਾ ਦੋਸਤ ਬਣ ਗਿਆ। ਖੇਪ ਈਰਾਨ ਤੋਂ ਆਈ ਸੀ ਅਤੇ ਮੱਧ ਪ੍ਰਦੇਸ਼ ਦੇ ਸ਼ਿਵਪੁਰੀ ਵਿਖੇ ਮਿਕਸਿੰਗ ਹੋਣੀ ਸੀ।
ਸਪੈਸ਼ਲ ਸੈੱਲ ਨੇ ਰਿਜਵਾਨ ਅਹਿਮਦ ਉਰਫ ਰਿਜਵਾਨ ਕਸ਼ਮੀਰੀ ਨਿਵਾਸੀ ਅਨੰਤਨਾਗ ਨੂੰ ਦਿੱਲੀ ਦੇ ਘੀਟੋਰਨੀ ਤੋਂ ਕਿੱਲੋ ਹੈਰੋਇਨ ਨਾਲ ਕਾਬੂ ਕੀਤਾ। ਉਸਨੇ ਖੁਲਾਸਾ ਕੀਤਾ ਕਿ ਉਹ ਅੰਤਰਰਾਸ਼ਟਰੀ ਡਰੱਗ ਰੈਕੇਟ ਦਾ ਕੋਰੀਅਰ ਹੈ। ਸਾਰਾ ਰੈਕੇਟ ਅਫਗਾਨਿਸਤਾਨ ਤੋਂ ਚੱਲ ਰਿਹਾ ਹੈ। ਦਿੱਲੀ ਪੁਲਿਸ ਨੇ ਗੁਰਪ੍ਰੀਤ ਸਿੰਘ ਅਤੇ ਗੁਰਜੋਤ ਸਿੰਘ ਨੂੰ ਐਨਐਸਜੀ ਵਿਹਾਰ ਕੋ-ਆਪਰੇਟਿਵ ਹਾਊਸਿੰਗ ਸੁਸਾਇਟੀ, ਸੈਕਟਰ 65, ਫਰੀਦਾਬਾਦ ਵਿਖੇ ਗ੍ਰਿਫਤਾਰ ਕੀਤਾ ਹੈ।
ਗੁਰਪ੍ਰੀਤ ਅਤੇ ਗੋਲੂ ਦੇ ਇਸ਼ਾਰੇ ‘ਤੇ ਸੁਸਾਇਟੀ ਦੀ ਪਾਰਕਿੰਗ ਵਿਚ ਖੜ੍ਹੀ ਹੁੰਡਈ ਵਰਨਾ ਕਾਰ ਤੋਂ 166 ਕਿਲੋ, ਹੌਂਡਾ ਅਮੇਜ਼ ਕਾਰ ਤੋਂ 115 ਕਿਲੋ ਅਤੇ ਉਨ੍ਹਾਂ ਦੇ ਕਮਰਿਆਂ ਵਿਚੋਂ 70 ਕਿਲੋ ਸ਼ੁੱਧ ਹੈਰੋਇਨ ਮਿਲੀ ਹੈ। ਇੰਨਾ ਹੀ ਨਹੀਂ, ਰਿਜਵਾਨ ਕਸ਼ਮੀਰੀ ਦੇ ਇਨਪੁੱਟ ‘ਤੇ, ਅਫਗਾਨ ਨਾਗਰਿਕ ਹਜ਼ਰਤ ਅਲੀ ਨੂੰ ਵੀ ਹਰਿਆਣਾ ਦੇ ਗੁਰੂ ਗਰਾਮ ਖੇਤਰ ਤੋਂ ਗ੍ਰਿਫਤਾਰ ਕੀਤਾ ਗਿਆ ਅਤੇ 2 ਕਿਲੋ ਹੈਰੋਇਨ ਬਰਾਮਦ ਕੀਤੀ ਗਈ।
ਅੰਮ੍ਰਿਤਸਰ ਦੇ ਬਜੀਰ ਭੁੱਲਰ ਦੇ ਵਸਨੀਕ ਨਵਪ੍ਰੀਤ ਸਿੰਘ ਦਾ ਨਾਮ ਡਰੱਗ ਰੈਕੇਟ ਵਿਚ ਸਾਹਮਣੇ ਆਇਆ ਹੈ। ਪੰਜਾਬ ਪੁਲਿਸ ਨੇ ਨਵਪ੍ਰੀਤ ਦੀਆਂ ਕਈ ਨਸ਼ਿਆਂ ਦੀ ਖੇਪ ਫੜੀ ਹੈ। ਉਹ ਜਲੰਧਰ, ਕਪੂਰਥਲਾ ਅਤੇ ਮੁਹਾਲੀ ਪੁਲਿਸ ਨੂੰ ਲੋੜੀਂਦਾ ਹੈ। ਫਿਲੌਰ ‘ਚ ਗੋਲੀ ਮਾਰ ਕੇ ਕਤਲ ਕਰ ਦਿੱਤੇ ਗਏ ਚਿੰਟੂ ਦੇ ਮਾਮਲੇ ‘ਚ ਨਵਪ੍ਰੀਤ ਦਾ ਨਾਮ ਸਾਹਮਣੇ ਆਇਆ। ਉਸ ਦੇ ਤਾਰ ਅਫਗਾਨਿਸਤਾਨ ਦੀ ਈਸ਼ਾ ਖਾਨ ਨਾਲ ਸਬੰਧਤ ਹਨ।
ਇਹ ਵੀ ਪੜ੍ਹੋ : 9 ਜ਼ਿਲ੍ਹਿਆਂ ‘ਚ ਬਾਰਿਸ਼ ਕਾਰਨ ਘੱਟੀ ਬਿਜਲੀ ਦੀ ਮੰਗ, ਤਲਵੰਡੀ ਸਾਬੋ ਦੀ ਯੂਨਿਟ ਕੱਲ੍ਹ ਹੋਵੇਗੀ ਮੁੜ ਸ਼ੁਰੂ
ਖਾਨ ਨਵਪ੍ਰੀਤ ਦੇ ਇਸ਼ਾਰੇ ‘ਤੇ ਨਸ਼ਾ ਭਾਰਤ ਭੇਜਦਾ ਹੈ। ਦੋਸ਼ੀ ਗੁਰਪ੍ਰੀਤ ਅਤੇ ਗੁਰਜੋਤ ਨੇ ਖੁਲਾਸਾ ਕੀਤਾ ਕਿ ਇਸ ਰੈਕੇਟ ਦਾ ਕਿੰਗਪਿਨ ਨਵਪ੍ਰੀਤ ਸਿੰਘ ਪੁਰਤਗਾਲ ਵਿੱਚ ਹੈ। ਮੁਲਜ਼ਮ ਦਾ ਮੰਨਣਾ ਹੈ ਕਿ ਉਹ ਨਵਪ੍ਰੀਤ ਨੂੰ ਕਪੂਰਥਲਾ ਜੇਲ੍ਹ ਵਿੱਚ ਮਿਲਿਆ ਸੀ। ਫਿਰ ਉਹ ਨਸ਼ੇ ਦੇ ਦੋਸ਼ ਵਿਚ ਜੇਲ੍ਹ ਵਿਚ ਸੀ। ਪੰਜਾਬ ਪੁਲਿਸ ਕੋਲ ਇਹ ਇਨਪੁੱਟ ਚੱਲਦੀ ਰਹੀ ਕਿ ਨਵਪ੍ਰੀਤ ਦੁਬਈ ਵਿੱਚ ਹੈ, ਪਰ ਹੁਣ ਪਤਾ ਲੱਗਾ ਕਿ ਉਹ ਪੁਰਤਗਾਲ ਵਿੱਚ ਹੈ।
