ਉੱਤਰਾਖੰਡ ਦੇ ਚਮੋਲੀ ਵਿੱਚ ਬਰਫ਼ਬਾਰੀ ਹੋਈ ਹੈ। ਜਲ ਸੈਨਾ ਦੀ ਟੀਮ ਇਸ ਦੀ ਪਕੜ ਵਿੱਚ ਆ ਗਈ ਹੈ। ਜਾਣਕਾਰੀ ਅਨੁਸਾਰ ਜਲ ਸੈਨਾ ਦੀ 20 ਮੈਂਬਰੀ ਟੀਮ ਮਾਉਂਟ ਤ੍ਰਿਸ਼ੂਲ ‘ਤੇ ਚੜ੍ਹਾਈ ਕਰ ਰਹੀ ਸੀ।
ਸ਼ੁੱਕਰਵਾਰ ਸਵੇਰੇ ਕਰੀਬ 5.30 ਵਜੇ ਦਲ ਦੇ ਪੰਜ ਮੈਂਬਰ ਅਤੇ ਉਨ੍ਹਾਂ ਦੇ ਨਾਲ ਆਏ ਇੱਕ ਪੋਰਟਰ ਬਰਫ਼ੀਲੇ ਤੂਫਾਨ ਦੀ ਲਪੇਟ ਵਿੱਚ ਆ ਗਏ। ਇਸ ਘਟਨਾ ਤੋਂ ਬਾਅਦ 6 ਲੋਕ ਲਾਪਤਾ ਹਨ। ਜਲ ਸੈਨਾ ਅਤੇ ਪ੍ਰਸ਼ਾਸਨ ਨੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ, ਪਰ ਹੁਣ ਤੱਕ ਉਨ੍ਹਾਂ ਦਾ ਕੋਈ ਸੁਰਾਗ ਨਹੀਂ ਮਿਲਿਆ ਹੈ। ਨਹਿਰੂ ਮਾਉਂਟੇਨਿਅਰਿੰਗ ਇੰਸਟੀਚਿਟ ਤੋਂ ਮਾਉਂਟ ਤ੍ਰਿਸ਼ੂਲ ਇੱਕ ਬਚਾਅ ਟੀਮ ਵੀ ਭੇਜੀ ਗਈ ਹੈ।
ਦੱਸ ਦੇਈਏ ਕਿ 20 ਮੈਂਬਰੀ ਮੁਹਿੰਮ ਟੀਮ 3 ਸਤੰਬਰ ਨੂੰ ਉੱਤਰਾਖੰਡ ਦੇ ਪੱਛਮੀ ਕੁਮਾਊਂ ਖੇਤਰ ਵਿੱਚ 7,120 ਮੀਟਰ ਉੱਚੀ ਚੋਟੀ ਲਈ ਮੁੰਬਈ ਤੋਂ ਰਵਾਨਾ ਹੋਈ ਸੀ। ਇਨ੍ਹਾਂ ਵਿੱਚੋਂ 10 ਪਰਬਤਾਰੋਹੀ ਸਿਖਰ ‘ਤੇ ਪਹੁੰਚਣ ਦੇ ਆਖਰੀ ਪੜਾਅ ‘ਤੇ ਪਹੁੰਚ ਗਏ ਸਨ, ਪਰ ਉਹ ਅਚਾਨਕ ਇੱਕ ਬਰਫ਼ੀਲੇ ਤੂਫਾਨ ਦਾ ਸ਼ਿਕਾਰ ਹੋ ਗਏ। ਇਨ੍ਹਾਂ ਵਿੱਚੋਂ 5 ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ। ਮਾਉਂਟ ਤ੍ਰਿਸ਼ੂਲ ਉਤਰਾਖੰਡ ਦੇ ਬਾਗੇਸ਼ਵਰ ਜ਼ਿਲ੍ਹੇ ਦੇ ਕੁਮਾਊਂ ਵਿੱਚ ਸਥਿਤ ਹੈ। ਪਰਬਤਾਰੋਹੀਆਂ ਦੀਆਂ ਟੀਮਾਂ ਅਕਸਰ ਇਸ ਸਿਖਰ ‘ਤੇ ਚੜ੍ਹਨ ਲਈ ਆਉਂਦੀਆਂ ਹਨ। ਇਸ ਤੋਂ ਪਹਿਲਾਂ, ਹਿਮਾਚਲ ਪ੍ਰਦੇਸ਼ ਦੇ ਲਾਹੌਲ-ਸਪੀਤੀ ਵਿੱਚ ਟ੍ਰੈਕਿੰਗ ਦੇ ਲਈ 16 ਟ੍ਰੈਕਰਾਂ ਦੀ ਇੱਕ ਟੀਮ ਖਾਮਿਗਰ ਗਲੇਸ਼ੀਅਰ ਵਿੱਚ ਲਾਪਤਾ ਹੋ ਗਈ ਸੀ। ਇਸ ਵਿੱਚੋਂ 11 ਮੈਂਬਰਾਂ ਨੂੰ ਬਚਾਇਆ ਗਿਆ।
