accident hockey player mother died: ਲੁਧਿਆਣਾ (ਤਰਸੇਮ ਭਾਰਦਵਾਜ)- ਖੇਡ ਜਗਤ ‘ਚ ਉਸ ਸਮੇਂ ਸ਼ੋਕ ਦੀ ਲਹਿਰ ਦੌੜ ਗਈ ਜਦੋਂ ਮਸ਼ਹੂਰ ਖਿਡਾਰੀ ਦੀ ਆਪਣੀ ਮਾਤਾ ਦੇ ਨਾਲ ਇਕ ਸੜਕ ਹਾਦਸੇ ਦੌਰਾਨ ਮੌਤ ਹੋ ਗਈ। ਦੱਸ ਦੇਈਏ ਕਿ ਮ੍ਰਿਤਕ ਖਿਡਾਰੀ ਮਾਤਾ ਸਾਹਿਬ ਕੌਰ ਹਾਕੀ ਅਕੈਡਮੀ ਜਰਖੜ ਦੇ ਮੁੱਖ ਗੋਲ ਕੀਪਰ ਗੁਰਿੰਦਰਪਾਲ ਸਿੰਘ ਵੜੈਚ ਸੀ, ਜਿਸ ਦੀ ਅੱਜ ਸਵੇਰੇ ਜਗਰਾਓਂ ਦੇ ਨੇੜੇ ਵਾਪਰ ਇਕ ਸੜਕ ਹਾਦਸੇ ਦੌਰਾਨ ਮੌਤ ਹੋ ਗਈ , ਇਸ ਦੌਰਾਨ ਉਸ ਦੀ ਮਾਤਾ ਸਰਬਜੀਤ ਕੌਰ ਦਾ ਵੀ ਦਿਹਾਂਤ ਹੋ ਗਿਆ।
ਦੱਸ ਦੇਈਏ ਕਿ ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਬੀਤੀ ਰਾਤ ਲਗਭਗ 12 ਵਜੇ ਜਦ ਗੁਰਿੰਦਰਪਾਲ ਸਿੰਘ ਵੜੈਚ (22) ਆਪਣੀ ਮਾਂ ਸਰਬਜੀਤ ਕੌਰ ਨਾਲ ਮੋਗਾ ਤੋਂ ਇਕ ਵਿਆਹ ਸਮਾਰੋਹ ‘ਚ ਸ਼ਾਮਲ ਹੋਣ ਉਪਰੰਤ ਆਪਣੀ ਕਾਰ ਰਾਹੀਂ ਵਾਪਸ ਆਪਣੇ ਪਿੰਡ ਵੜੈਚ ਆ ਰਿਹਾ ਸੀ ਤਾਂ ਜਦੋਂ ਉਹ ਜਗਰਾਓਂ ਪੁੱਜਾ ਤਾਂ ਇਸ ਦੌਰਾਨ ਇਕ ਢਾਬੇ ਦੇ ਸੜਕ ‘ਤੇ ਖੜ੍ਹੇ ਇਕ ਟਰਾਲੇ ਨਾਲ ਉਨ੍ਹਾਂ ਦੀ ਟੱਕਰ ਹੋ ਗਈ। ਇਸ ਦੁਰਘਟਨਾ ‘ਚ ਗੁਰਿੰਦਰਪਾਲ ਸਿੰਘ ਅਤੇ ਉਸ ਦੀ ਮਾਂ ਸਰਬਜੀਤ ਕੌਰ ਦੀ ਮੌਕੇ ‘ਤੇ ਮੌਤ ਹੋ ਗਈ।
ਦੱਸਣਯੋਗ ਹੈ ਕਿ ਗੁਰਿੰਦਰਪਾਲ ਸਿੰਘ ਜਰਖੜ ਹਾਕੀ ਅਕੈਡਮੀ ‘ਚ ਪਿਛਲੇ 7 ਸਾਲ ਤੋਂ ਟਰੇਨਿੰਗ ਲੈ ਰਿਹਾ ਸੀ। ਉਹ ਹਾਕੀ ਦਾ ਰਾਸ਼ਟਰੀ ਪੱਧਰ ਦਾ ਖਿਡਾਰੀ ਸੀ। ਉਸ ਨੇ ਜਰਖੜ ਹਾਕੀ ਅਕੈਡਮੀ ਵੱਲੋਂ ਖੇਡਦੇ ਹੋਏ ਸਕੂਲੀ ਮੁਕਾਬਲਿਆਂ ‘ਚ ਸਟੇਟ ਅਤੇ ਅੰਤਰਾਸ਼ਟਰੀ ਪੱਧਰ ‘ਤੇ ਖੇਡਿਆ ਅਤੇ ਉਸ ਦੇ ਉਪਰੰਤ ਗੁਰੂਸਰ ਕਾਲਜ ਸੁਧਾਰ ਵੱਲੋਂ ਖੇਡਦੇ ਹੋਏ ਆਲ ਇੰਡੀਆ ਅੰਤਰ ਯੂਨੀਵਰਸਿਟੀ ਪੱਧਰ ‘ਤੇ ਆਪਣੀ ਖੇਡ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਜ਼ਿਕਰਯੋਗ ਹੈ ਕਿ 2019 ‘ਚ ਆਲ ਇੰਡੀਆ ਦਸਮੇਸ਼ ਹਾਕਸ ਗੋਲਡ ਕੱਪ ਹਾਕੀ ਟੂਰਨਾਮੈਂਟ ਰੋਪੜ ‘ਚ ਜਰਖੜ ਹਾਕੀ ਅਕੈਡਮੀ ਨੂੰ ਚੈਂਪੀਅਨ ਬਣਾਉਣ ‘ਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। ਕਈ ਸਰਕਾਰੀ ਵਿਭਾਗੀ ਟੀਮਾਂ ਨੂੰ ਹਰਾਉਣ ਦੇ ਉਪਰੰਤ ਉਹ ਟੂਰਨਾਮੈਂਟ ਦਾ ਸਰਵਉਤਮ ਖਿਡਾਰੀ ਬਣਿਆ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ 16 ਅਕਤੂਬਰ ਨੂੰ ਪਿੰਡ ਵੜੈਚ ‘ਚ ਕੀਤਾ ਜਾਵੇਗਾ।
